Julia Barretto nasasaktan pag tinatawag na maarte
HINDI namin napanood ang pilot airing ng fantaseryeng MiraBella noong Lunes dahil nawalan ng signal ang SkyCable sa lugar namin, at tapos na ang serye nang maayos ito.
Mukhang inabangan talaga ang launching serye ni Julia Barretto dahil nakakuha ito ng 22% kumpara sa Paraiso Ko’y Ikaw na 10% lang na malapit na ring mamaalam sa ere.
Bagama’t tagumpay ang launching serye ni Julia ay hindi pa rin lubos ang kasiyahang nadarama ng dalagita dahil sa ilang hinanakit niya sa ilang tao na nagsasabing maarte siya.
Ito ang nabanggit ni Julia sa panayam sa kanya ng Aquino-Abunda Tonight noong Lunes. Natanong ni Kris si Julia kung nasasaktan siya kapag nasasabihan siya ng maarte, “It’s not easy to be, mahirap kasi ‘yung maraming nagdya-judge sa ‘yo na hindi ka naman kilala at all.
That’s not easy to deal with also at 17. “But you can’t explain yourself to everybody, and ayaw mo rin, eh, kasi they don’t all deserve to be given an explanation about yourself. But, you know what, I’m being me,” paliwanag ng aktres.
Dagdag pa niya, “Honestly, what I think is it’s better to be yourself and be different because that’s what’s going to set you apart from everybody.
“Because that’s the least I want to be, like everybody else. Everybody is too the same na, e, and that’s the only way to be different, to just be yourself.”
Natanong din nina kuya Boy at Kris kung paano natanggap ni Julia ang paghihiwalay ng magulang niyang sina Marjorie Barretto at Dennis Padilla.
Inamin nitong sa edad na 17 ay kailangan niyang tanggapin at nirerespeto raw niya ang desisyon ng magulang niya lalo’t nakikita naman niyang masama ngayon ang mommy Marjorie na masaya, “I need to be tough at 17,” ani Julia.
Samantala, mukhang may crush na nga si Julia sa leading man niya sa MiraBella na si Enrique Gil dahil sa tanong ni kuya Boy na halimbawang huling araw na at magugunaw na ang mundo at kinukulit siya ng aktor na sagutin na siya, sasagutin ba niya ang binata?
Kaagad na sumagot si Julia ng “yes” kaya natuwa sa kanya ang hosts ng Aquino-Abunda Tonight at sinabihan siyang, “Thank you for being so brave and honest.”
Samantala, napapanood ang MiraBella gabi-gabi, bago mag-TV Patrol sa Primetime Bida ng ABS-CBN.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.