Yael Yuzon kay Vice Ganda: Kahit kailan hindi po ako nambastos ng mga bading

PAGKATAPOS magpadala ng bulaklak ni Karylle kay Vice Ganda kamakailan bilang paghingi ng sorry ay tumawag naman ang fiancé ng dalaga na si Yael Yuzon sa TV host-comedian kahapon para ipaliwanag ang buong pangyayari.

Ayon kay Yael, “I do not discriminate gay people. I never did and I would never say anything na ganu’n. I am thankful that Direk Bobet (Vidanes) tried to fix the situation. I already called Vice, and cleared what was needed to be clarified.”

Bago pa tumawag si Yael kay Vice ay humingi na kami ng statement sa bokalista ng SpongeCola sa pamamagitan ng publicist niyang si Chuck Gomez noong isang araw para maliwanagan kung ano ba ang tunay na nangyari.

At natanong nga rin namin kung galit ba sa bakla si Yael para makapagsalita siya ng hindi maganda sa ka-loveteam ng mapapangasawa niya.

Ayon kay Chuck, “Kapatid, hindi siya galit sa bakla at hindi siya homophobic. Personally, ayaw na naming palakihin ang isyu dahil eventually, magkakaayos din sina Vice at Karylle at saka naniniwala ako na magkakaayos sila soon.

“Anim na taon ko nang kliyente ang Spongecola, si Yael at kilala mo ako na baklang-bakla at hindi ko nakokontrol ang pagiging bakla ko, sa tingin mo tatagal ako kung pinaplastik ako ni Yael?

“At saka kunsintidora ‘yan sa akin kasi kapag nagkukuwento ako sa kanya ng mga crush ko o alam mo na, pinagsasabihan niya ako ng, ‘Mag-ingat ka nga baka magkasakit ka.’ So, ibig sabihin, sincere siya sa akin at tanggap niya ang kabaklaan ko, so hindi siya galit sa bakla.

“Feeling ko, misunderstood lang talaga ‘yung pagkakasabi ni Karylle o pagkakakuwento niya kay direk Bobet Vidanes.
“Wala akong hinuhusgahan kasi wala naman ako roon, kaya hindi ko rin alam, hindi ko hinuhusgahan si Vice dahil kaibigan ko siya at kinuwentuhan lang din siya, so siguro, ang dapat interbyuhin, e, si direk Bobet kung paano niya sinabi at ano ang pagkaka-intindi niya sa kuwento ni Karylle sa kanya.

“This is the time na masaya dapat sina Yael at Karylle dahil ikakasal na sila, kaya tigilan na ‘yang mga nega-nega na ‘yan, kapatid, hindi makakatulong ‘yan sa isyu at umaasa ako na magkaka-ayos sila,” ani Chuck Gomez.

At dahil tumawag na si Yael kay Vice ay naniniwala kaming nagkaliwanagan na sila. Kaya ang aabangan na lang natin ay kung dadalo si Vice sa kasal nina Yael at Karylle dahil ang alam namin ay imbitado ang buong tropa ng Showtime.