Jake Zyrus maligaya sa bagong dyowa, pero…

SHYRE AQUINO AT JAKE ZYRUS

MALIGAYA ang personal na buhay ngayon ni Jake Zyrus dahil sa kanyang bagong girlfriend. Pero mas magiging masaya raw siya kung magkakaayos na sila ng kanyang inang si Mrs. Raquel Pempengco.

Sa panayam ng Tonight With Boy Abunda kay Jake kamakalawa ng gabi, lagi raw niyang ipinagdarasal na sana’y maayos na kung anuman ang problema nilang mag-ina.

“Opo naman kasi importante po sa akin na kung mag-reach out po ako, I hope na two way street din po sana. Na yung feeling na maramdaman ba na yung, love and realization na, eto ka e, at mamahalin kita kahit ano ka pa,” pahayag ng singer.

Mariin ding itinanggi ni Jake na third party o pera ang dahilan ng breakup nila ni Alyssa Quijano, “Yung feeling namin nu’ng nag-break kami walang heavy…we really talked it out. I guess talagang. we were the case na talagang mas okay kami na friends kami.”

Kasama ni Jake ang bago niyang karelasyon sa guesting niya sa TWBA na si Shyre Aquino na inilarawan pa niyang “exquisite.”