Paglipat ni Kris sa GMA 7 hindi pa sigurado, hahabulin pa rin ng ABS

KRIS AQUINO

TULUYAN nang nilisan ng mag-iinang Kris Aquino, Joshua at Bimby ang bahay nila sa Green Meadows kahapon base na rin sa Instagram post ng Queen of All Media noong Miyerkules ng hatinggabi.

Ayon sa post IG ni Kris, “Goodbye 111 Greenmeadows Avenue- we spent our 1st night here November 30, 2013. And tonight, August 31, 2016 we’re spending our last night. This home brought us many blessings & many happy memories, including forever etched in my heart unforgettable #KrisTvepisodes.

“Goodbye to QC for now, we’ll be back once our new home is done. A special thank you to LBC for helping us move, YES, #PanatagKaNaDaratingAngPagibigMo,” sey pa ng TV host.

Bulong ng aming source na posibleng sa bahay muna ni dating Presidente Noynoy Aquino sa Times Street, West Avenue muna pansamantalang maninirahan ang mag-iina habang ginagawa pa ang bahay na lilipatan nila na abutin pa raw ng siyam na buwan.

“Pansamantala lang sila Kris sa bahay ni P-Noy kasi hindi naman sila kasya ro’n, ang alam ko, magre-rent una sila ng condo,” say ng aming source.

At dahil tapos na ang ghost month ay baka raw isa sa mga araw na ito ay magbibigay na ng official statement si Kris tungkol sa pagpirma niya ng kontrata sa talent manager na si Mr. Tony Tuviera ng APT Entertainment.

Inaabangan din ng netizens kung totoo na marami na ang naka-line up na show para kay Kris ang GMA na ipo-produce ng APT.

Pero may sitsit sa amin na hindi pa rin daw nakasisiguro ang GMA na magkakaroon ng show sa kanila ang TV host dahil interesado pa rin daw ang ABS-CBN kay Kris at nasulat na rin ito ng isa sa aming katoto sa ibang pahayagan.

Nagtanong naman kami sa isang taga-GMA 7, “Honestly, tahimik dito, walang sinasabi kung anong shows ni Kris, if ever, hindi naman ito station produced kasi under siya ng APT ni Mr. Tony Tuviera, so blocktimer ‘yun. Ang tanong din namin, anong show o anong timeslot?”

May nakapagsabi rin sa amin na digital shows ang gusto ni Kris at ang APT Entertainment daw ang mamamahala rito, at travel show daw ang concept nito.

Kailan kaya magpapa-interbyu si Kris Aquino para magkalinawan na? O, baka posible pa siyang mahabol ng ABS-CBN dahil naniniwala kami na hindi basta-basta pakakawalan ng Kapamilya network ang mama nina Josh at Bimby.