Pakiusap sa mga fans nina Matteo at Sarah: Wag nilang apihin si Shaina!

MARAMI kaming natanggap na reaksyon tungkol sa pagkakasangkot ni Shaina Magdayao sa relasyong Matteo Guidicelli at Sarah Geronimo na natsismis na naghiwalay na raw.

Hindi nagustuhan ng fans ni Shaina na idawit ang aktres sa isyu para pag-usapan sina Matteo at Sarah na parehong may concert, (MG1 ni Matteo sa Music Museum at From The Top ni Sarah sa Araneta Coliseum sa Dec. 4 at 5).

Puwede naman daw pag-usapan ang magkasintahan nang hindi nababanggit si Shaina. Sabi sa amin ng isang fan ni Shaina, “Wag naman nilang apihin si Shaina, pinartner na nga kay Matteo tapos gagawing kontrabida sa kanila ni Sarah.

Puwede namang i-promote ang concert ni Sarah ng walang banggitan ng name ni Shaina, di ba panggagamit ‘yun?” Katwiran namin na kaya lang nabanggit si Shaina ay dahil may serye sila ni Matteo sa Cinema One, “Bakit na-isyu si Shaina kay Matteo kasi mahina ang serye nila, kasi naman ipinalalabas sa tagong channel, e, hindi naman lahat may cable!” sabi sa amin.

Hindi na kami sumagot pa bossing Ervin pero may hirit pa ulit ang kausap namin, “Oo nga pala, bakit ginawa na lang background girl si Shaina sa ASAP20?” Sinabi namin sa fans ni Shaina na ipararating namin sa ASAP20 ang mga hinaing nila.