PINANGUNAHAN ni Fil-Tongan big man Moala Tautuaa ang inisyal na listahan ng mga aplikante ng gaganaping 2015 PBA Rookie Draft sa Agosto 23 sa Robinsons Place Manila sa Ermita, Maynila.
Ang 6-foot-7 sentro at 2015 PBA D-League Foundation Cup Most Valuable Player na si Tautuaa ang kinokonsiderang top pick ng ilang scouts at nakatutok din ang Talk ‘N Text Tropang sa kanya para gawing No. 1 pick overall sa draft.
Subalit maliban kay Tautuaa, palaban rin para sa top spot si dating 6-foot-6 National University Bulldogs forward Troy Rosario na isinama ni coach Tab Baldwin sa training pool ng Gilas Pilipinas para sa 2015 FIBA Asia Championship.
Kasama rin sa mga nag-apply sa rookie draft ang ilang miyembro ng Gilas cadets team na nanalo ng gintong medalya sa 2015 Southeast Asian Games sa Singapore.
Pinamumunuan ito nina San Beda Red Lions guard Baser Amer, NCAA Season 90 MVP at Perpetual Help Altas guard Earl Scottie Thompson, La Salle Green Archers guard Almond Vosotros, dating Red Lions guard at 2014 PBA D-League Aspirants’ Cup MVP Garvo Lanete at NU Bulldogs forward Glenn Khobuntin.
Sumama na rin sa draft ang miyembro ng 2015 PBA D-League Aspirants’ Cup champion Hapee Fresh Fighters na sina Art dela Cruz ng San Beda at Ateneo Blue Eagles players Chris Newsome at Nico Elorde.