HINDI nakilahok ang mga senador at kongresista sa isinagawang isang oras na Metro Manila earthquake drill.
Sa Kamara, ang mga House employees ang nagkunwaring mga kongresista na nasa session hall nang gawin ang simulated 7.2 earthquake drill alas 10:30 hanggang alas 11:30 ng umaga Huwebes.
Sa ginawang “drama” sa Batasang Pambansa, walo umanong congressman ang namatay sa nasabing “lindol” na sinundan ng pagkasunog.
Hindi rin nakilahok ang mga senador sa drill sa gusali ng Senado, bagamat ilan sa kanila ay nanawagan sa pamamagitan ng kanilang mga social media account na makiisa sa Metro Manila wide drill.
Sa Palasyo, nakisabay din ang mga empleyado sa drill.
Hindi rin nakita sa scenario si Pangulong Aquino.
Paliwanang ni Secretary Coloma, sa ganitong mga sitwasyon ay kailangan umano na “confidential” ang kinaroroonan ng pangulo.
Gayunman, nilinaw nito na ang pangulo ay kasama niya sa Bahay Pangarap, official residence ni Pangulong Aquino, at nagmomonitor ng mga kaganapan sa iba’t ibang bahagi ng bansa.
Samantala, ilang matataas na opisyal na pinangungunahan ni Interior Secretary Mar Roxas, Defense Secretary Voltaire Gazmin ang sumali naman sa drill sa Camp Aguinaldo.