Demolisyon sa Caloocan nauwi sa karahasan

NAUWI sa karahasan ang demolisyon sa Calaanan compound sa Caloocan City matapos gamitan ng sumpak at pagbabatuhin ng mga bato at bote ang mga pulis ng mga residente.
Tatlong pulis ang nasugatan matapos ang nangyaring karahasan sa demolisyon na batay sa demolition order na ipinalabas ni Judge Eleanor Ong ng Caloocan Regional Trial Court branch 128.

Sinabi ni Northern Police District (NPD) director Chief Superintendent Jonathan Miano na kabilang sa mga sugatan ay si PO1 Virgilio Cabangis matapos siyang tamaan ng sumpak sa kanyang kaliwang hita.
Nagtamo naman ang dalawa pang pulis ng mga sugat sa kanilang balikat matapos silang pagbabatuhin ng mga bato at kahoy.

Nagmula ang mga nasugatang pulis mula sa public safety battalion ng NPD.

Dinala si Cabangis Manila Central University Hospital.
Samantala, inaresto naman ng mga pulis si Junel Orlando, na itinuturong nagpaputok ng sumpak. Hinuli rin si Edwin Cantos na siya namang nambato sa mga pulis.