BAGO para kay Glaiza de Castro ang mga role tulad ng karakter niya bilang si Althea Guevarra sa The Rich Man’s Daughter ng GMA 7 na magsisimula na ngayong gabi sa Telebabad block. Siya ang gaganap na lover ni Rhian Ramos.
Gayumpaman, hindi pa rin nagdalawang-isip ang dalaga na tanggapin ang role na ipinagkatiwala sa kanya ng mga bossing ng Siyete. “The role itself, hindi kasi sya familiar sa lahat.
“Well, familiar ako sa general perception ng lesbians na masculine pero it’s beyond that eh. Nung nabasa ko yung script, ay kailangan natin ‘to bigyan ng justice, kailangan talaga namin mag-aral at paghandaan ito,” anang dalaga.
Para kay Glaiza, bilang aktres, tungkulin niyang i-explore ang iba’t ibang roles upang mas matuto siya at mas lumalim pa ang understanding niya bilang artista.
Lubos naman ang pasasalamat niya sa direktor ng tomboyserye ng GMA na si Dominic Zapata, “Thankful ako with the help of Direk Dom.
Natutulungan niya kami na kahit papaano na makita namin yung character, mag-improve kami kada-taping. Learning experience siya every taping day may natutunan kaming bago sa sarili namin at sa character namin.”
Samantala, nang tanungin sina Glaiza at Rhian kung willing ba silang maghalikan sa harap ng camera para sa The Rich Man’s Daughter, agad na sumagot si Glaiza ng, “Why not?” kaya naman nataranta si Rhian at sinabing wala pa raw sa usapan ang mga ganong bagay.
Pero umamin naman si Rhian na tinatrato niya si Glaiza katulad ng pagtrato niya sa mga naging leading man niya. “Yung trato ko sa kanya the same way I would treat any other romantic partner in a show.
“ I want to present myself in a likeable way para pag dumating sa eksena na intimate kami or nagkakagustuhan, hindi mahirap hanapan ng hugot,” paliwanag ng Kapuso actress.
Dagdag pa ni Rhian, “If we’re really required to be really close to each other, nako-conscious din ako at nagma-mouth wash muna ko, pabango konti. Ninenerbyos ako, diba? Parang nakakahiya naman kay Glaiza.”
Mapapanood na tonight ang The Rich Man’s Daughter. Makakasama rin nila rito sina Luis Alandy, Katrina Halili, Mike Tan, Sheena Halili, Gloria Romero, Al Tantay at marami pang iba.
Speaking of katomboyan, wala pa naman daw experience sa tibo si Rhian, wala rin daw nagtangkang manligaw na lesbian sa kanya. “Never pa! Never,” natatawang chika ni Rhian.
“Never ko pa na-experience, e. Kasi ako, well sure ako sa sarili ko na straight ako. ‘Cause I find boys guwapo, ‘di ba,” tawa uli ni Rhian.
“And so far, everyone I’ve been attracted to is a guy. Pero ayun nga, e, yung pinag-iisipan ko, yung katulad kasi ni Jade, akala niya din buong buhay niya straight siya, e.
Isang araw lang talaga, may nakita siyang tao and iba yung naramdaman niya. So iniisip ko, posible ba yun mangyari sa akin?”