Sulat mula kay Laarnie Bagolatao, Minalabac, Camarines Sur
Problema:
1. Dati na akong nag-Japan at nakapagtrabaho ako doon sa isang factory. Kaya lang umuwi ako kasi na-expired ang visa ko. Sa ngayon ay balak kong bumalik uli sa tulong ng aking bayaw na isang Hapon. Kaya lang ay mag iisang taon na akong nag-aayos ng papeles hanggang ngayon di pa rin ako nakakakuha ng visa.
2. Itatanong ko lang kung may pag-asa pa kaya akong makabalik ng Japan at muling magkaroon ng magandang trabaho doon? April 10, 1987 ang birthday ko.
Umaasa,
Laarnie ng Camarines Sur
Solusyon/Analysis:
Astrology:
Ang zodiac sign mong Aries (Illustration 2.) ang nagsasabing kung ang bayaw mong Hapon na tumutulong sa iyo ay isinilang sa zodiac sign na Sagittarius o kaya ay Leo, tiyak ang magaganap —matutulungan ka niya upang sa taon ding ito ng 2015 muli kang makabalik sa Japan.
Numerology:
Ang birth date mong 10 ay nagsasabing sa sandaling nakabalik ka uli sa Japan bilang pangalawang beses ay tuloy-tuloy na uli—lagi ka nang makakapag-Japan hanggang sa tulad ng iyong ate ay makapag-aasawa ka na rin ng isang Hapon hanggang sa tuloy-tuloy na ring yumaman.
Graphology:
Upang magtuloy-tuloy pang lalo ang suwerte at magandang kapalaran, habaan mo ang krokes ng letrang “t” sa iyong pirma. Sa mahabang krokes ng letrang “t” ay tuloy-tuloy ka nang magtatagumpay sa larangan ng salapi. Magkakaroon ka rin ng isang maligaya, maunlad at panghabambuhay na pamilya.
Huling payo at paalala:
Laarnie, ayon iyong kapalaran ay ituloy mo lang ang layunin mo na muling makabalik ng Japan dahil sa taong ito, sa buwan ng Agosto o kaya ay Setyembre sa edad mong 28 pataas, ay matutupad na ang matagal mong hinihintay at pinapangarap. Sa ikalawang pagkakakataon, isang mas produktibo at mas masaganang pagdya-Japan ang mararanasan.