CA nagpalabas ng TRO vs suspension ni Junjun Binay

NAGPALABAS kahapon ang Court of Appeals (CA) Sixth Division ng 60-araw temporary restraining order (TRO) na nagpapatigil sa kautusan ng Office of the Ombudsman na isuspinde si Makati Mayor Jejomar Erwin “Junjun” Binay ng anim na buwan.
Nauna nang sinuspinde ng Ombudsman si Binay noong Marso 11, 2015, matapos kasuhan ng isang special panel si Binay at maraming iba pa ng graft at malversation of public funds kaugnay ng umano’y overpriced Makati City Parking Building 2.
Naghain ng petisyon si Binay sa CA na humihiling na maglabas ng TRO laban sa kautusan ng Ombudsman.
Hiniling din ni Binay na ipawalang bisa ang kanyang pagkakasuspinde sa pagsasabing nagmalabis ang Ombudsman nang ipalabas ang kautusan.
Sa limang-pahinang kautusan, itinakda ng CA ang oral argument para sa permanenteng injunction na hinihingi ni Binay sa Marso 30.