Hamon kay Raymart: Ligawan na agad si Jennylyn

TULOY ang kilig moments sa pagitan nina Raymart Santiago at Jennylyn Mercado. Base sa mga komentong nababasa namin mula sa mga tumututok sa kanilang GMA Telebabad series na Second Chances, hindi talaga sila bumibitiw gabi-gabi sa kuwento nina Lyra at Bernard.

Hinamon pa nga ng netizens si Raymart na ligawan na si Jennylyn dahil nga bagay na bagay sila. Baka raw kapag hindi pa kumilos ang nakahiwalay na asawa ni Claudine Barretto ay maunahan pa siya ng iba.

Sabi nga nila, nasa huli palagi ang pagsisisi. In fairness, true ang observation ng mga manonood, talagang bagay maging dyowa sa tunay na buhay sina Jen at Raymart, dahil bukod sa ang lakas ng chemistry nila bilang magka-loveteam, ang lakas makakilig ng mga sweet moments nila sa Second Chances.

Anyway, ngayong gabi sa pagpapatuloy ng Second Chances, may hahampas na malakas na alon. Didilat si Billy (Joshen Bernardo) but he realizes na ang layo na niya kay Rebecca (Camille Prats) na nakapikit pa rin.

Susundan pa ito ng isa pang alon. Mahihiwalay kay Billy ang salbabida niya na ikalulunod ng bata.Tatawagin ni Billy si Rebecca. Taranta si Rebecca. She will try to swim towards him pero malayo-layo pa siya.

Maiyak-iyak na si Rebecca sa panic. Pero may jetski na lalapit kay Billy. Mula rito, tatalon si Lyra (Jennylyn) para sagipin si Billy. Yayakap kaagad sa kanya ang bata.

Nakabalik na sa pampang sina Rebecca, Billy, Jerome (Rafael Rosell) at Lyra. Safe na si Billy. Ipagpapaalam ni Jerome na ibibili ng ice cream si Billy para mapasaya uli ito, papayag naman si Rebecca.

Pag-alis ng dalawa ay tila magni-nervous breakdown naman si Rebecca sa kamuntikang pagkalunod ng anak. May magbabalita naman kay Bernard (Raymart) ng nangyari kay Billy kaya susugod agad ito sa shore.

Magagalit pa siya kay Rebecca pero ipagtatanggol naman ito ni Lyra. Pupuntahan ni Bernard si Billy sa ice cream stand. Iku-comfort naman ni Lyra si Rebecca.

Nang malaman ni Bernard na si Lyra ang sumagip kay Billy ay pinuntahan niya ito sa room niya pero dinatnan niya doon si Jerome habang nasa banyo at naliligo si Lyra.

Pinagsabihan pa ni Jerome si Bernard na tantanan na niya si Lyra dahil nagmumove-on na raw ito with him. Hurt si Bernard na aalis.Magkasabay na paalis ang kotse nina Bernard at Jerome sa parking ng resort.

Makikita ni Bernard si Lyra; saglit na titigan ang dalawa.  Makikitingin si Jerome at sisenyas sa kaniya si Bernard na mauna na sila. Malungkot na nakatingin si Bernard kay Lyra habang papalayo ang kotse nila ni Jerome.