Markado sa amin ang petsa at taon ng pagiging magkarelasyon nina Direk Paul Soriano at Toni Gonzaga. Hulyo ng 2007 ‘yun, kasalukuyang nakaburol ang mga labi ng aming ama, personal pa naming nakausap ang aktres-TV host nang dumalaw siya sa lamay.
Unang boyfriend ni Toni ang direktor, kaya ang hiling na kanyang inang si Mommy Pinty, sana’y sila na ang magkatuluyan tulad din ng kanyang mga magulang.
Pagkatapos ng pitong taon at kalahati, ngayon ay desidido na silang magpakasal, ayon sa direktor ay sa taong ito ang kasalan pero wala pa silang sinasabing buwan kung kailan ang pagharap nila sa altar.
Sobrang higpit ng ama ni Toni, bawal siyang magpunta sa trabaho ng direktor para dumalaw, bawal ding magpunta si Direk Paul habang nagtatrabaho siya.
Idinadaan na lang nila sa pagpapadalahan ng pagkain ang pagmamahal nila sa isa’t isa. Nakadadalaw naman ang direktor sa kanilang bahay sa Taytay, pero hanggang alas dose lang nang gabi ito puwedeng mamalagi, hanggang sa sala lang ang kanilang pag-uusap o kaya’y sa kusina habang nagkukuwentuhan sila.
Pinasasalamatan ni Toni ang kanyang ama dahil sa mga pinairal nitong batas sa kanilang tahanan, ngayon nga naman ay puwede niyang iregalo ang kanyang sarili sa mapapangasawa niya nang walang bahid-dungis, purung-puro ang kanyang pagkabirhen.
Nagpapasalamat din si Toni kay Direk Paul dahil nirespeto nito ang kanyang mga magulang, hindi niya diretsong sinabi ang dahilan, pero sa mga nagbabasa sa pagitan ng mga salita ng aktres-TV host ay malinaw na nirespeto ng direktor ang kanyang pagkababae.