‘BANGKAY’ biglang nabuhay sa teleserye nina Enrique at Liza

ISA sa mga inaabangang karakter sa seryeng Forevermore nina Enrique Gil at Liza Soberano sa ABS-CBN ay ang komedyanteng si Bangkay o mas kilala ngayon bilang si Bangki.

Nonong de Andres ang totoong pangalan ni Bangki na isa sa mga nagbibigay katatawanan sa nasabing programa ng ABS-CBN. Nakilala noong dekada 80 at 90 ang aktor sa mga horror at comedy films kung saan laging patay o zombie ang kanyang role, kaya naman binigyan siya ng pangalang “Bangkay.”

Mas nakilala pa si Bangki nang paulit-ulit siyang napapanood sa mga pelikula ng Comedy King na si Dolphy. Matagal na hindi napanood ang aktor sa telebisyon at pelikula dahil sa personal na kadahilan.

Pero matapos nga ang pitong taon, bumalik sa pag-arte si Bangkay na sinwerteng napasama Forevermore. Sa interview ng Rated K  sinabi nitong, “Kung kailan nga tumanda e.

Masayang-masaya ako. Di ko akalaing darating ang suwerte na ito.”Sey pa ng komedyante, dahil sa super close na samahan nila sa serye dahil na rin sa tagal na nilang pamamalagi sa Tuba, Benguet kung saan sila nagte-taping, ay nakatagpo siya ng ikalawang pamilya.

Sabi naman ng leading lady ni Enrique sa serye na si Liza, “Super happy ako para kay Tito Bangki. Love niya ang craft niya. Kahit may sakit siya, andito siya sa taping and he enjoys everything, so deserve talaga niya (ang tagumpay).”

Hirit naman ni Enrique, “Sabi niya, ‘parang alam ko sa 30 years ko sa business sa showbiz, ngayon lang ako nabigyan ng importance.’ Ako parang, seryoso, 30 years tapos ngayon lang? E ang galing-galing niya e!”

Tinanong naman ng host ng Rated K na si Korina Sanchez kung anu-ano sa mga horror movies na nagawa niya ang hinding-hindi niya makalimutan.

“Yung ‘Huwag Mong Buhayin Ang Bangkay’. Talagang natakot sa ‘kin ang mga tao doon. Isipin mo nga e, kapag bumaba ako sa isang kalsada, ‘yung naglalarong mga bata, mawawala lahat ‘yun.

Pati matatanda rin, pati taxi driver, di ako pinaparahan pag wala akong kasama.”  In fairness, hindi lang sina Liza, Enrique at iba pang sikat na artista sa Forevermore ang pinagkakaguluhan ngayon ng mga turistang dumadalaw sa location ng serye, dahil kahit si Bangki ay laging nire-request ng fans para maka-selfie.