Kim: Kung binibili ang award, dapat noon pa ko bumili!

Tila napikon na si Kim Chiu sa mga pambabatikos sa kanya ng ilang bashers tungkol sa pagkakapanalo niyang Best Actress sa nakaraang PMPC Star Awards for TV 2014.

Meron kasing kumukuwestiyon kung bakit siya ang nagwagi (para sa seryeng Ikaw Lamang (with Coco Martin), hindi raw siya deserving sa award, mas may karapatan daw manalo ang mga nakalaban niya sa pagka-Best Drama Actress na sina Bea Alonzo (Sana Bukas Pa Ang Kahapon), Angel Locsin (The Legal Wife), Maricel Soriano (Ang Dalawang Mrs. Real) at Dawn Zulueta (Bukas Na Lang Kita Mamahalin).

Nakalaban din niya sina Lovi Poe (Ang Dalawang Mrs. Real) at Maja Salvador (The Legal Wife). Sabi pa nga ng ilang intrigera, baka raw binili ni Kim ang napanalunang tropeo dahil kahit saan daw nila tingnan, hindi pa raw hinog ang aktres sa nasabing parangal.

Paano naman daw niya matatalo sina Bea, Maricel, Dawn at Angel sa mga ginawa nilang teleserye, e, nakita naman daw ng buong mundo kung paano siya umarte.

At dahil nga sa mga pang-iinsulto sa kanya ng mga salbaheng netizen, naglabas na ng saloobin si Kim, idinaan niya ito sa  kanyang official Twitter account.

Sabi ni Kim, “Kung binibili ang award sana bumili nko noon pa po. #justsaying #goodvibes lang po tayo dito. mag thank u kay papa God sa lhat ng blessings:)”

Samantala, todo naman ang pasasalamat ni Kim kay Angel Locsin matapos itong  nagpadala ng bulaklak para i-congratulate siya sa kanyang pagkakapanalo, “Thank you @therealangellocsin for this beautiful flowers! Such a sweet surprise! salamat!”