Gumawa na naman ng eksena ang tropa ni Mary Christine Jolly nu’ng Lunes sa dapat sana’y muli nilang paghaharap sa piskalya ng Makati ni Derek Ramsay.
Winidrow ng babae ang asuntong R.A. 9262 na isinampa niya laban sa hunk actor, sa DOJ na lang daw nila ‘yun ihahain, dahil nakatanggap sila ng mga impormasyon na walang mangyayari sa nasabing asunto sa piskalya ng Makati.
Maraming naloka sa naging aksiyon ni Mary Christine Jolly, talagang ipinaramdam niya na may tinititigan at tinitingnan lang ang piskalya, kaya ililipat na niya sa DOJ ang kanyang reklamo.
Kahit hindi niya diretsong sinasabi ay parang gustong tukuyin ng ina ng anak ni Derek na may “mga kamay” na gumagalaw para hindi magtagumpay ang kasong ihinain niya sa piskalya ng Makati.
Puro sapantaha lang ang sinasabi ng babae, basta raw, hahanap na lang sila ng lugar kung saan siya mabibigyan ng hustisya.
Tuloy ay hindi natin masisisi ang mga kababayan natin na nagkokomento na parang ginagawang laro lang ni Mary Christine Jolly ang isang napakaseryosong usapin.
Parang nagiging moro-moro na tuloy ang istoryang ito, nakakaloka nang sundan, dahil baka bukas ay iba na naman ang kauwian ng kuwento.