FEU NAKUBRA ANG NO. 2 SPOT, TWICE-TO-BEAT

Laro sa Miyerkules
(Araneta Coliseum)
4 p.m. Ateneo vs NU (Final Four)

TUMATAG pa ang paghahabol ng Far Eastern University ng puwesto sa finals sa 77th UAAP men’s basketball nang kunin ang twice-to-beat advantage laban sa nagdedepensang kampeong De La Salle University sa 65-60 panalo sa playoff kahapon sa SM Mall of Asia Arena sa Pasay City.

Maagang nagdomina ang Tamaraws at nang bumangon ang Green Archers at nakalamang pa sa huling 3:20 ng huling yugto, 58-60, ay may inilabas pa nang tapusin ang laban bitbit ang 7-0 run.

Ang panalo ay nagresulta para okupahan ng tropa ni FEU coach Nash Racela ang ikalawang puwesto at kailangan na lamang manalo sa Setyembre 27 para pumasok sa championship round.

Ang isang Final Four ay sa pagitan ng Ateneo de Manila University at National University na magsisimula sa Miyerkules sa Smart Araneta Coliseum at ang Blue Eagles ang may twice-to-beat advantage.

“We showed our character today. We were making the right decisions, we were persevering especially when we were struggling in the second half,” wika ni Racela na hindi pa natatalo sa tatlong laro ng La Salle sa taong ito.

Si Mike Tolomia ay gumawa ng 19 puntos at apat dito ay kinamada matapos agawin ng Archers ang kalamangan mula sa buslo ni Arnold Van Opstal.

Ang pabiting layup ni Tolomia upang maiiwas kay Van Osptal ang bola ang nagpatabla sa laro sa 60-all bago kumana ng split sa 15-foot line para ibigay na ang kalamangan sa Tamaraws.

Hindi na nakapuntos ang Archers dahil napahirapan sa depensang inilatag ng katunggali.

Sina Van Opstal ay may magkasunod na errors habang si Mark Belo ay binulilyaso ang undergoal shot ni Norbert Torres na nagresulta sa layup sa kabilang dulo ni Carl Bryan Cruz tungo sa 63-60 kalamangan.

Gumawa si Tolomia ng 19 puntos habang may 15 puntos at 10 rebounds si Belo para pamunuan ang Tamaraws.