John Amores muling nagbabalik sa PBA

MULING nagbabalik sa Philippine Basketball Association (PBA) ang naging kontrobersyal na NorthPort cager na si John Amores.

Ito ay matapos siyang papirmahin ng kontrata ng Titan Ultra para sa nalalabing bahagi ng Season 50 ng Governors’ Cup.

Matapos masuspinde sa liga nang mahigit isang taon kaugnay ng insidente ng pamamaril sa Laguna na nagresulta rin sa pagbawi ng kaniyang lisensya ng Games and Amusements Board (GAB), muling nagbabalik si Amores sa paglalaro sa PBA.

Kasama niya ang kanyang representative na si Donny Espiritu sa kanyang pagpirma ng bagong kontrata ilang araw bago ang pagsisimula ng  season-ending conference sa Ynares Center sa Antipolo City.

Baka Bet Mo: John Amores negative sa gunpowder test

Matatandaang unang naglaro si Amores para sa NorthPort franchise na ngayon ay nasa ilalim na ng Titan Ultra.

Ito ay matapos na maging maayos ang kasong isinampa laban sa kaniya kaugnay ng insidente ng pamamaril.

Dahil rito ay nakatanggap si Amores ng clearance mula sa GAB upang maipagpatuloy ang kaniyang basketball career.

Ipinaalam naman ng GAB sa pamunuan ng PBA ang pag-isyu ng bagong lisensya sa basketbolista kaya pinayagan ito na makasama sa official roster ng Titan Ultra para sa darating na conference.

Natupad at naiayos naman ang lahat ng mga nasa mandato ng GAB bago muling makapaglaro si Amores gatan ng pagsasagawa ng community service at charity work pati na rin ang pagdalo sa psychological at psychiatric consultations.