First-ever Safe Spaces Seminar para sa Drag Community inarangkada

TAPOS na ang Pride Month, pero hindi pa tapos ang laban para sa ligtas na espasyo o “safe spaces”, lalo na para sa drag community ng bansa.

Nitong July 8, isang makasaysayang hakbang ang naganap nang ilunsad ng The Playhouse ang Drag Space Project.

Ito ay sa pakikipagtulungan ng Department of Justice Action Center (DOJAC), Kababaihan Organization, at Rainbow Rights.

Tampok sa inisyatibang ito ang isang espesyal na seminar tungkol sa anti-sexual harassment at Safe Spaces Act, na isinagawa ng DOJAC at iniakma para mismo sa drag community.

Ginanap ang seminar sa Rampa Drag Club sa Quezon City, isang lugar na kinikilala ng komunidad bilang ligtas na espasyo para sa self-expression at empowerment.

Baka Bet Mo: Pride Month 2025: QC all-out support sa LGBTQIA+ biz sa kauna-unahang summit

Ito’y isinagawa sa gitna ng mga seryosong alegasyon ng sexual misconduct na kinasasangkutan ng ilang kilalang personalidad sa drag scene.

Ayon kay Eva Le Queen, isang celebrity drag artist, President ng The Playhouse, at Founder ng Drag Space Project, hindi na maaaring balewalain ng komunidad ang mga ganitong isyu.

“Yes, abuse and harassment happen—but I want to give our industry a chance. We are not complicit in that kind of behavior. We are drag artists—we bring joy, magic, and happiness to people,” sey niya.

Patuloy pa niya, “But if we turn a blind eye to what is happening in front of us, what does that make us? We do not want to enable that kind of behavior. Education is always the key. We don’t have enough of it right now. Gender sensitivity is part of our industry, and this needed to be done.”

Nagpahayag din ng buong suporta si DOJ Undersecretary Margarita Gutierrez, isang kilalang kakampi ng LGBTQIA+ community at tagasuporta ng drag scene.

“Makakaasa kayong andito ang Department of Justice—hindi lang para makinig, kundi para kumilos,” sambit ni Gutierrez sa kanyang welcome remarks.

Dagdag pa niya, “Through this DOJAC lecture series, we hope to empower you with knowledge. Our goal is simple but powerful: to build a drag space that is safe, respectful, and just for all. A space where we know our boundaries—on and off stage. A space where we feel brave enough to speak up when something’s not right. A space where accountability matters. These are the safe spaces we all deserve. Because when we make the drag space safe, we also uplift the entire LGBTQIA+ community.”

Pinangunahan ni DOJAC Program Director at Assistant State Prosecutor Joan Carla Guevarra ang seminar.

Ipinaliwanag niya ang mga legal na batayan ng safe spaces gamit ang malinaw at madaling maunawaang mga halimbawa na akma sa karanasan ng drag community.

Tinalakay rin niya ang pagkakaiba ng Safe Spaces Act at Anti-Sexual Harassment Act of 1995, pati na ang mga posibleng paglabag sa ilalim ng Acts of Lasciviousness.

Kabilang ang Kababaihan Organization sa mga nag-organisa ng seminar bilang patuloy na pagsuporta nito sa pagtataguyod ng ligtas at inklusibong espasyo para sa drag community.

Bukod dito, bahagi ng adbokasiya ng organisasyon ang itaguyod ang gender sensitivity, empowerment, at katarungan para sa lahat.

Ipinunto naman ni Rainbow Rights Advocacy Officer Pura Luka Vega ang kahalagahan ng seminar bilang paalala kung paano maaaring maging proteksyon ang batas, hindi lang para sa queer community kundi pati na rin sa mga patron ng drag art.

“This isn’t just about safeguarding queer people, but also the patrons who support and enjoy the art of drag,” wika niya. 

Saad niya, “Rainbow Rights will discuss the nuances of the law and how it can be implemented through a human rights lens. Sometimes, we all need to be reminded of the value of a human rights approach in everything we do.”

Layunin ng Drag Space Project na maging social responsibility arm ng buong drag industry.

“Hindi tayo titigil sa isyu ng sexual assault,” lahad ni Eva Le Queen.

Chika pa niya, “Pwede nating gamitin ang platapormang ito para sa iba pang makabuluhang adbokasiya. Lahat ng puwede nating gawin para makatulong.”

Sinabi rin niya na malaki ang impluwensya ng drag community: “Ang laki ng clout, ng following, ng reach ng drag. Kaya dapat gamitin natin ito para sa kabutihan—hindi lang para sa ating komunidad, kundi para sa lahat ng sumusuporta at nagmamahal sa drag.”

Dinaluhan ang workshop ng iba’t ibang miyembro ng drag scene, kabilang na ang mga queens, event promoter, club owner, assistant, dancer, patron, at iba pang tagapagtaguyod ng sining ng drag.