Delia Razon at Carla Abellana
BINALIKAN ng Kapuso actress na si Carla Abellana ang mga alaala ng namayapa niyang lola – ang veteran actress na si Delia Razon.
Pumanaw ang beteranang aktres nitong nagdaang March 15, sa edad na 94. Wala oang ibinibigay na anumang detalye ang pamilya ni Delia Razon kung ano ang naging sanhi ng kanyang pagkamatay.
Sa Instagram, nagbahagi si Carla ng ilang litrato ng kanyang pinakamamahal na lola kabilang na ang kanilang mga family photos.
Sa kanyang caption, inilarawan niya si Delia Razon bilang, “the strongest, bravest, fiercest, and most beautiful.”
Isa sa mga litratong ipinost ng Kapuso star ay ang liham na isinulat niya noong bata pa siya para sa kanyang lola. Mababasa rito ang paghiram niya ng children’s Bible kasabay ng pangakong ibabalik din niya ito pagkatapos niyang mabasa.
Nagpasalamat si Carla kay Lola Delia sa pagpapahiram sa kanya ng Bible. Sa huling bahagi ng letter ng aktres ay mababasa ang mensaheng, “I love you verry verry verry much.”
Isa si Delia Razon sa mga pinakasikat na aktres ng film company na LVN Pictures noong dekada 50. Ang una niyang ginawang pelikula ay ang “Krus na Bituin.”
Ilan sa mga naging leading man niya noon ay sina Rogelio de la Rosa, Manuel Conde, Nestor de Villa, Carlos Salazar, Armando Goyena, at Jaime de la Rosa.
Bumida rin siya sa mga pelikulang “Gitano” (1949), “Mutya ng Pasig” (1950), “Rodrigo de Villa at Digmaan ng Damdamin” (1952), “Señorito” (1953), “Dambanang Putik” (1954), “Lapu-Lapu” (1955), at “Luksang Tagumpay” (1956).
Nakagawa rin siya ng mga teleserye tulad ng “Agila” (1987), “Bigong Sibol” at “Bayang Impasibol” (2001). Napanood din siya sa mga serye ng ABS-CBN tulad ng “Tayong Dalawa” (2009) na pinagbidahan nina Kim Chiu, Gerald Anderson at Jake Cuenca.
Napangasawa ng veteran actress ang negosyanteng si Aurelio Reyes at biniyayaan ng tatlong anak – sina Carl Glenn Reyes, Maria Aurelia Reyes at Rea Reyes.
Si Rea Reyes ang napangasawa ng aktor na si Rey “PJ” Abellana, ang mga magulang ni Carla Abellana.
Sa isang panayam, sinabi ni Delia na hindi niya in-expect na papasukin ni Carla ang showbiz na nagtapos ng Bachelor of Science in Psychology sa De La Salle University.
“She studied well, she graduated (Summa) Cum Laude. I never realized she would enter the movies. Somebody just said, ‘O, yung apo mo (nasa showbiz na).’
“I said, ‘Who?’ ‘Carla!’ (I was like) ‘What?’ I was surprised, but she’s doing well. She’s a very good child, she’s a very good apo. No complaints. I’m happy for her.
“I told her only one thing, secret… ‘Use your eyes.’ Iba ang feelings, iba ang eyes,” sabi pa ni Delia Razon.