IBINASURA ng Commission on Elections (Comelec) First Division ang isinampang disqualification case laban sa limang miyembro ng Tulfo clan, kabilang na ang magkapatid na senatorial candidates ACT-CIS Rep. Erwin Tulfo at broadcaster Ben Tulfo.
Base sa desisyon na inilabas nitong Martes, March 4, hindi umano nakapagbigay ang kampo na naghain ng petisyon ng mga kopya ng certificate of candidacy (COC) ng limang Tulfo na importante para ma-verify ang mga impormasyon kaugnay ng reklamo.
“Upon scrutiny of the submitted Petition and its attachments, it appears that the Petitioner failed to provide the copies of Respondents’ COCs, which would have been vital in order to properly verify the necessary information alleged in the Petition,” saad ng COMELEC.
“Consequently, it cannot also be verified whether the Petition was properly served to the Respondents. Settled is the rule that failure to comply with a mandatory requirement warrants the dismissal of the Petition,” dagdag pa.
Baka Bet Mo: ‘Sexy Babe’ contestant walang alam sa Comelec, sey ni Vice: Bothersome!
Sinabi rin naman ni Comelec Chairman George Garcia na pwede pa ring maghain ang petitioner ng motion for reconsideration.
Matatandaang noong February 18 nang sampahan ng disqualification case ang magkapatid na Tulfo, kasama ang kamag-anak nilang sina ACT-CIS Rep. Jocelyn Pua-Tulfo (asawa ni Sen. Raffy Tulfo), Quezon City 2nd District Rep. Ralph Wendel Tulfo (anak nina Sen. Raffy at Rep. Jocelyn), at Turismo party-list nominee Wanda Tulfo-Teo (kapatid ng Tulfo Brothers).
Ang naghain ng disqualification case ay ang abogadong si Virgilio Garcia, kung saan iginiit nito ang usapin ng “political dynasty.”
Nagsalita naman si Sen. Raffy Tulfo kaugnay ng kaso.
“I’ll leave it up to the people. Kasi kung gusto ka ng tao, iboboto ka nila. Kung ayaw ka nila, maiisip nila ay dynasty ito. Ang dami naman, walang ginagawa,” ang pahayag ng senador.
Dagdag pa niya, “Kung ayaw n’yo mga kapatid ko, please don’t vote for them. Pero kung gusto n’yo sila dahil sa tingin n’yo makakapagsilbi sila nang maayos, then go ahead. Kayo na ang mag-decide.”