Photo courtesy of Bombo Radyo
SA edad na 77, matapang pa ring nagpatuli ang isang lolo sa isang barangay sa Maguindanao del Sur kamakailan.
Sinamantala ng naturang lalaki ang pagkakataon na makapagpatuli sa naganap na “Libreng Tuli” na bahagi ng Medical Outreach Program ng lokal na pamahalaan ng Maguindanao.
Bukod dito nagsagawa rin iba’t ibang serbisyong medikal sa mga residente ng nasabing probinsya, lalo na sa mga kapuspalad at walang budget para sa pagpapagamot.
Ayon sa lolo, matagal na niyang gustong magpatuli kaya nang mabalitaan nga niya ang Medical Outreach Program sa kanilang lugar ay talagang naglaan siya ng panahon para makapunta sa venue.
Baka Bet Mo: Robin saludo sa mga delivery rider: May doctorate diyan pero panggugulang at panloloko naman ang ginagawa
Aniya, hindi siya nakakapagpatuli dahil sa iba’t ibang dahilan tulad ng kakulangan sa impormasyon, oportunidad, at mga medikal na serbisyo sa kanilang lugar.
Bukod sa 77-anyos na lolo, isang 40-anyos na magsasaka at dalawang mas batang lalaki, edad 31 at 21 ang nakisali rin sa “Libreng Tuli.”
“Ngayon lang ako nagpatuli dahil ang gobyerno na mismo ang nagdala ng serbisyo sa amin,” ang pahayag ng isa sa kanila base sa ulat ng Bombo Radyo.
Ayon sa isang opisyal ng Maguindanao del Sur Provincial Government, “Patuloy kaming bumibisita sa mga malalayong lugar upang matulungan ang mga nangangailangan.”