Isko Moreno
IPINAKITA ni Isko Moreno Domagoso, kandidato sa pagka-alkalde ng Maynila, ang kanyang malasakit sa mga Pilipino sa pamamagitan ng paglalaan ng mahigit P100 milyon mula sa kanyang talent fees.
Ang pondong ito ay ginamit upang tugunan ang mga pangangailangan sa kalusugan, edukasyon, at sakuna—mga sektor na may direktang epekto sa buhay ng maraming Pilipino.
Malaking bahagi ng pondong ito ang inilaan para sa kalusugan, partikular sa mga batang may malubhang karamdaman.
Halos P40 milyon ang inilaan para sa liver transplant ng 20 kabataan, habang P32 milyon ang ginamit upang makapagpatayo ng cancer ward para sa mga bata sa Philippine General Hospital (PGH).
Baka Bet Mo: Isko sumagot sa banat ni Mayor Honey Lacuna tungkol sa utang ng Maynila
Para sa iba pang serbisyong medikal, P2.5 milyon ang inilaan sa cancer treatment sa PGH, P143,000 para sa Hemophilia Advocates Philippines, at P122,000 bilang tulong para sa PGH frontliners at COVID-19 patients.
Sa mga malalayong lugar, P750,000 ang inilaan para sa Tanulong Health Center sa Sagada at P100,000 naman para sa Philippine Heart Center.
Upang matulungan ang mga mag-aaral na makaangkop sa online learning noong pandemya, P11.5 milyon ang inilaan para sa mga tablet na ipinamigay sa mga estudyante ng Universidad de Manila.
Sa Cavite, P10 milyon ang inilaan sa Fr. Al’s Children Foundation upang masuportahan ang edukasyon ng mga kabataang mula sa mahihirap na pamilya.
Sa Museo Pambata naman, P2 milyon ang napunta para sa mga programang pang-edukasyon at pangkultura na nakatuon sa kabataan.
Isa rin sa mga pangunahing prayoridad ni Moreno ang pagtulong sa mga nasalanta ng sakuna, kabilang dito ang P10.7 milyon para sa mga nasunugan sa Isla Puting Bato, P9.5 milyon para sa Aroma Tondo, at P2.9 milyon para sa Barangay 310, Sta. Cruz.
Para naman sa mga biktima ng natural na kalamidad, P5 milyon ang inilaan para sa mga naapektuhan ng lindol sa Cotabato noong 2019, at P4 milyon para sa mga nasalanta ng pagsabog ng Bulkang Taal noong 2020.
Sa Cebu, P9 milyon ang inilaan para sa mga nasunugan sa Mambaling.
Hindi lamang malalaking proyekto ang tinutukan ni Moreno dahil kasama rin sa mga proyektong kanyang sinuportahan ang P35,000 para sa mga overseas Filipino workers, P1 milyon para sa programang “Tahanang PinakaMasaya,” at P1.4 milyon para sa restorasyon ng Sto. Niño Church sa Pandacan.
Ang mahigit P100 milyon mula sa kanyang talent fees ay hindi lamang simpleng donasyon—ito’y konkretong aksyon na nagbigay ng agarang solusyon sa mga pangangailangan ng mga Pilipino.
Mula sa kalusugan at edukasyon hanggang sa pagtulong sa mga biktima ng sakuna, pinakita ni Moreno ang uri ng lideratong hindi lamang nakikiramay, kundi aktibong kumikilos para sa kapakanan ng sambayanan.