Rey Valera at Marco Sison
HINDING-HINDI na papasukin uli ng OPM hitmaker na si Marco Sison ang mundo ng politika kahit pa may mga kumukumbinsi pa rin sa kanya.
As in suko na raw siya sa pagtakbo sa kahit ano pang posisyon sa gobyerno dahil feeling niya hindi talaga para sa kanya ang politika.
Nakachikahan ng BANDERA ang veteran singer-songwriter sa presscon ng upcoming concert nila ng isa pang OPM legend na si Rey Valera, ang “Ang Guwapo at Ang Masuwerte”.
Kuwento ni Marco, tatlong beses siyang nanalo noong tumakbo siya bilang konsehal sa Biñan, Laguna pero dalawang beses siyang natalo nang tumakbo sa mas mataas na posisyon.
Ayon sa beterano at premyadong singer, naniniwala siya na may mensahe nang nais iparating sa kanya si Lord pagdating sa kanyang political career.
“Ibig sabihin ng Diyos, huwag mo nang pasukin ‘yan hindi mo ‘yan kaya. Dito kayo mas marami kayong mapapasaya,” ang pahayag pa ni Marco na ang tinutukoy ay ang kanyang pagiging singer.
Samantala, kahit maraming pumipilit sa kanya na sumabak sa politika, hindi raw talaga nakumbinsi si Rey Valera.
Inamin niyang hindi niya keribels ang makipaghalubilo sa maraming tao kahit noong nagsisimula pa lamang siya sa entertainment industry.
“Naalala n’yo ‘yung sinasabi kong nerd ako? ‘Yung privacy ng isang nerd talagang kanya ‘yung buhay niya, eh.
“Ang problema kapag politiko ka, lulusubin ka ng mga katakut-takot na mga resibo ng hospital, kung anu-anong mga ano…kakatukin ka, hindi ka tatantanan.
“Magmumukha ka namang ano kapag hindi mo sila inabutan araw-araw. May mga consequences ‘yun,” paniniwala ng OPM icon.
Anyway, magaganap ang concert na “Ang Guwapo at Ang Masuwerte” sa Music Museum sa November 22 produced by Echo Jham Entertainment Production. Special guest nila ang mga promising young singers na sina Andrea Gutierrez at Elisha.