Mga Laro Bukas
(SM Mall of Asia Arena)
12:20 p.m. Letran vs
San Sebastian
2:30 p.m. San Beda vs Perpetual Help
INABSUWELTO ng NCAA Management Committee si Ryusei Koga at nanatiling top seed ng Final Four ng men’s basketball ang San Beda Red Lions.
Dahil sa kakulangan ng ebidensiya ay hindi na itinuloy ng ManCom ang pagdinig sa kaso ni Kogi at ng isa pang NCAA player na si Jeremiah Taladua ng Lyceum.
Sina Koga at Taladua ay pinaghinalaang naglaro sa ibang liga sa kahagitnaan ng NCAA season. Labag ito sa panuntunan ng NCAA.
Sakaling napatunayang lumabag nga si Koga sa patakarang ito ay masususpindi siya ng tatlong laro at babawiin sa San Beda ang apat na panalo na nakuha nila kung saan naglaro sa kanila si Koge.
Ang Red Lions ay tumapos sa unang puwesto sa 15-3 baraha sa elims at nangambang babagsak sila sa 11-7. Papasok pa rin naman sa semis ang koponan pero mahuhulog na ito sa ikaapat na puwesto.
Dahil sa desisyon ng NCAA ManCom ay matutuloy ang Final Four bukas sa SM Mall of Asia Arena sa Pasay City nang walang aberya.
Sa unang laro ganap na alas-12:30 ng hapon ay magtutuos ang No. 2 Letran Knights at No. 3 San Sebastian Stags at dakong alas-2:30 naman ay maghaharap ang No.1 San Beda Red Lions at No. 4 Perpetual Help Altas.
Tangan ng Red Lions at Knights ang twice-to-beat advantage sa semifinal round. Ang mga laro ay ipapalabas ng live sa TV5.
Sinabi naman ni San Beda team manager Jude Roque na dumalo sa PSA Forum sa Shakey’s Malate kahapon ng umaga na hindi nag-sagawa ng sariling imbestigasyon ang San Beda dahil wala naman silang nakuhang opisyal na komunikasyon mula sa liga hinggil sa protesta o sa imbestigasyon.
“Nalalaman lamang namin ang mga nangyayari sa mga nababasa namin kaya mahirap isipin ang puwedeng mangyari. We are waiting for the decision and kami, if the decision is fair, we will abide and cooperate,” sabi ni Roque.
Pumunta rin sa lingguhang forum si Letran assistant coach Gerald Francisco. Aniya, hindi nila iniisip ang imbestigasyon patungkol kay Koga at sa halip at itinutuon ang ensayo para sa Final Four.
Si Caloy Garcia ang nakaupong mentor ng Letran matapos palitan si Louie Alas na nagbitiw matapos mabigo ang koponan sa pagbulsa sa titulo noong nakaraang taon kontra San Beda.
“Masaya kami dahil nasa Final Four kami at nagawa ito kahit bago ang mga coaches. Ang mga players ang mga veterans kaya sa kanila kami aasa. Sa ngayon ay San Sebastian ang makakalaban namin pero puwedeng magbago.
Basta kami laro lang at kahit sino ang makalaban, walang problema,” sabi ni Francisco. Sinabi naman ng ManCom na sakaling may lumabas na matibay na ebidensiya ay bubuksan nila ang kaso laban sa dalawa.