NAPAKASAKIT ng iyak ng dating komedyante na si Mura matapos masunog ang kanilang bahay sa Ligao, Albay.
Ilang taong pinaghirapan ni Mura at ng kanilang pamilya ang pagpapatayo ng kanilang tahanan ngunit sa isang iglap lang ay natupok nga at nawala na parang bula.
Bukod sa mahahalagang kagamitan, nasunog din daw ang mga regalo sa kanya ng namayapang kaibigang si Mahal na tine-treasure niya
Nagkuwento si Mura o Allan Padua sa tunay na buhay, sa nakaraang episode ng “Kapuso Mo, Jessica Soho” at dito nga niya naibuhos ang sobrang kalungkutan at panghihinayang sa natupok nilang buhay.
Nangyari ang insidente noong April 27 at dahil nga raw malayo ang bumbero sa kanilang lugar ay hindi agad nakaresponde ang mga ito at halos wala rin daw silang naisalbang gamit.
Baka Bet Mo: Mura nasunugan ng bahay, nakatira sa waiting shed
“Sa tagal mong nagtrabaho, pinaghirapan mo rin ito, hindi mo alam ganito rin lang mangyayari ulit. Kasi pangatlong sunog namin ito. Nakakalungkot lang kasi bigla rin siyang nawala,” ang umiiyak na pahayag ni Mura.
“Hindi ko alam, iyon ang masakit. Hindi ko alam kung saan ako mag-uumpisa. Bakit kasi ito nangyayari sa amin.
“Kung puwede lang magpahinga na rin lang ako…tuloy-tuloy na yung pagpahinga ng buhay ko rin,” aniya pa.
Pagbabahagi pa ni Mura, may isang kuwarto raw sa itaas ng kanilang bahay na pinamahayan ng bubuyog kaya ang ginawa raw ng kanyang ama ay pinausukan ito sa pamamagitan “onlong” o iyung sinunog na bahagi ng puno ng niyog.
Baka raw may bagang nahulog mula sa onlong hanggang sa kumalat ang apoy. Posibleng hindi raw napansin ng kanyang tatay na malabo na rin ang mga mata
“Matanda na rin si Papa, malabo na rin ang mga mata. Mahirap naman pagsabihan mo baka kung ano pang mangyari sa kanya,” sey ni Mura.
Sa ngayon ay naninirahan pansamantala si Mura at ang kanang tatay sa kanilang tiyahin sa Ligao.
Matatandaang nagpahinga sa showbiz si Mura para pagtuunan ang pagtatanim sa kanilang probinsya. Ngunit naaksidente ang komedyante noong 2010 sa tricycle at napuruhan ang balakang at hindi na nga nakapaglakad nang maayos.
Bukod dito, hindi rin makalakad ngayon ang kanyang ama matapos madulas nang puntahan ang nasunog nila bahay.