Francine Diaz
HINDING-HINDI pababayaan ng Kapamilya young actress na si Francine Diaz ang kanyang pag-aaral kahit pa super busy siya sa pagtatrabaho.
Desidido ang dalaga na makapagtapos at makakuha ng college diploma dahil naniniwala siya na napakahalaga pa rin sa isang tao ang naka-graduate at may pinanghahawakang “sandata.”
“Kapag alam ko na parang medyo kulang ang knowledge ko, I feel powerless,” ang pahayag ni Francine sa kanyang pagbisita sa “Magandang Buhay” kahapon.
“Mahalaga po sa akin ang pag-aaral kasi it makes me feel I am powerful. Ganu’n po kahalaga sa akin ‘yon,” ang chika pa ng aktres nang matanong kung ano para sa kanya ang importansya ng edukasyon.
“Hindi lang para masabi ko na matalino ako, nakapagtapos ako, pero pangarap ko rin po talaga ‘yon para sa sarili ko,” sey pa ng ka-loveteam ni Seth Fedelin.
Bukod dito, isa pa sa dream ng aktres ang makitang makapagtapos ang kanyang mga kapatid at magkaroon ng maayos na buhay at magandang kinabukasan.
Baka Bet Mo: 67-anyos na lola nakapagtapos ng junior high: ‘Hindi nakakahiyang magsimula uli kahit ikaw ay senior citizen na’
Tungkol naman sa kung paano niya napagsasabay ang kanyang trabaho, pag-aaral at pamilya, “For me, mas inuuna ko ang responsibility bilang anak kaysa responsibility sa sarili ko. So, top priority talaga ang family and then saka na lang ako.”
Wala rin daw isyu sa kanya kung minsan ay nakakalimutan niya ang sarili, dahil nagpapakahirap at nagsasakripisyo talaga siya para sa pamilya.
Samantala, siniguro naman ni Francine na ikagugulat ng manonood ang mga eksena sa huling tatlong linggo ng kanilang serye na “Dirty Linen” sa iba’t ibang ABS-CBN platforms.
Kasama rin sa nasabing serye sina Janine Gutierrez, zanjoe marudo, seth fedelin, Janice de belen, John arcilla at marami pang iba.