Gladys matagal nang bilib kay Barbie, wish maging kontrabida ni Vilma: ‘Gustung-gusto kong maramdaman kung paano ko aapihin si Ate Vi’
By: Ervin Santiago
- 1 year ago
Gladys Reyes at Barbie Forteza
BAGO pa man tumanggap ng mga papuri at parangal ang Kapuso Drama Princess na si Barbie Forteza, ay bumilib na talaga sa kanya ang premyadong aktres na si Gladys Reyes.
Noong nagkasama at magkatrabaho raw sila sa GMA series na “Inday Will Always Love You” ay napatunayan na niya ang galing ni Barbie at ang pagiging professional nito sa lahat ng bagay.
Napag-usapan ang pagiging kontrabida ni Gladys sa episode ng “Fast Talk with Boy Abunda” last Monday, April 10, kung saan game na game niyang sinagot ang mga maiintrigang tanong sa kanya ni Tito Boy.
Nagbahagi ang itinanghal na best actress sa 1st Summer Metro Manila Film Festival para sa “Apag” kung paano nito nagagawa ang matitinding eksena niya sa teleserye at pelikula lalo na kung kailangan na niyang saktan at pagsalitaan ng masasama ang mga co-actors niya.
Sabi ni Gladys, mas gusto niyang hindi dinadaya ang mga eksena lalo na ang sampalan at iba pang uri ng pisikalan. At dito ba nga niya nabanggit si Barbie dahil talagang totohanan ang ginawa nilang mga eksena noon sa “Inday Will Always Love You.”
“Sa totoo lang Tito Boy mas maganda na hindi nandadaya. I’ve worked with Barbie Forteza, bilib na bilib ako sa batang ‘yan kasi ‘yung talagang sinasaktan ko siya, totoo.”
“Nasasaktan talaga ‘yung bata kasi totoong sampal. Doon mo kasi maka-capture ‘yung totoong reaksyon e, kung daya, ‘yung totoong pain ba maka-capture?” pagbabahagi ni Gladys.
Aniya pa, matagal na niyang wish na makaeksena ang Star for All Seasons na si Vilma Santos sa isang acting project, “Gustong-gusto ko talagang maramdaman kung paano ko aapihin si Ate Vi.
“Mahihiya ba ako, mai-intimidate ba ako kay Ate Vi kapag nandoon na? Baka hindi ko magawa ‘yung talagang eksena,” sabi ng aktres na kasali ngayon sa dalawang official entry sa ginaganap na Summer Metro Manila Film Festival 2023.
Nagpapatawa siya ng manonood sa “Here Comes the Groom” at magpapaiyak naman siya sa “Apag.” Showing na ang mga ito ngayon sa mga sinehan nationwide.