HINDI nagustuhan ng Kapuso actor na si Tom Rodriguez ang pagkalat sa social media ng isang video habang ginagawa niya ang engagement ring para kay Carla Abellana.
Dismayado ang aktor na inunahan pa siya ng taong nagpakalat ng nasabing video sa internet nang wala man lang paalam sa kanila ni Carla.
Mapapanood sa video ang naging proseso ng paggawa ni Tom sa diamond engagement ring na ibinigay niya sa kanyang fiancé noong mag-propose siya kamakailan.
Ipinost ng Kapuso star sa kanyang Instagram Story ang kanyang naramdaman nang malamang nasa social media na ang nasabing video. At dahil dito, hindi na niya ibabahagi sa publiko ang ginawa niyang YouTube vlog para rito.
Caption ni Tom sa kanyang IG post, “I was supposed to release my ring making video on YouTube today…
“But since someone already beat me to it and it’s already all over YouTube and Instagram, I’ve decided to just keep the video for myself instead, and just savor and treasure the memories,” diin pa ng future husband ni Carla.
Sa huling panayam ng entertainment press kay Tom, proud nitong ikinuwento na pinag-aralan talaga niya at kinarir ang paggawa ng diamond ring ni Carla sa tulong na rin ng Radiant Lux Jewelry.
Makikita sa engagement photos ng dalawa ang nasabing singsing na may isang malaking diamond na pinalilibutan ng 12 eternity diamonds. Sumisimbolo raw ito sa birthday ni Carla na June 12.
“We weighed pa the gold, we melted it, and beat it to its shape hanggang sa ma-align. I shaped it to the ring form hanggang sa sizing it, polishing it, so it was quite an experience!” pahayag ni Tom.
Noong October, 2020 pa nag-propose si Tom kay Carla ngunit kamakailan lamang nila ito ibinandera sa publiko bilang pagrespeto sa hirap na dinaranas ng sambayanan dulot ng COVID-19 pandemic.
Ayon kay Tom, nagdesisyon siyang yayain na si Carla na magpakasal kahit may pandemya dahil na-feel niya na kailangan na niya itong gawin.
“My fear even pre-pandemic, I have already intentions to propose, and it would always get cut short because of my fears, anxieties of what’s going on in the world, if I was ready, like financially, everything, before we set-up for building a family.
“But since now there’s still resurgence again in cases, we decided na wala pala eh. The lesson was if you try to wait for the right time lagi, it may never come. Because what is the right time if it’s not something that you feel inherently? It’s your intuition talaga will tell you,” paliwanag ni Tom sa isang panayam.
Aniya pa, noon daw ay sinabi nila ni Carla na hangga’t maaari ay ayaw nilang ikasal sa pandemic set-up, “Pero she woke up one day and ‘Boom!’ I knew it was the right time and there was no fear involved and siguro it was the most lucid moment I’ve ever had, as in wala talaga.”