Wow, mali!
Apat na magkakabarkadang nagkatuwaan sa Valenzuela City ang inaresto nang ang plano nilang manakot sa mga dumadaan ay di naging katawa-tawa para sa pulisya.
Ang drama, si Mark Francis Habagat, 20, ay magpapanggap na patay sa loob ng isang sako na “nakatapon” sa tabing daan sa Barangay Paso De Blas.
Samantala, ang tatlo nyang katropa–sina Mark Aldrin Arce, 20; Chris Bayron, 20; at Wynzel Tan, 19–ay nakatago sa di kalayuan habang nagbi-video ng mga taong takot habang dumadaan sa nakasakong “bangkay.”
Ang siste, isa sa mga natakot ay nag-report sa nagpapatrolyang pulis, na kaagad namang rumesponde sa ulat.
Sinabi ni Police Staff Sergeant Regor Germedia na katuwaan lang umano ang sinasabing pakay ng apat na kabataan at hindi nila layong makasakit ng ibang tao.
Gusto rin nilang i-upload sa social media ang video, sabi ni Germedia, na nag-imbistiga ng kaso.
Pero hindi katanggap-tanggap para sa pulisya ang “trip” ng magto-tropa.
Arestado ang apat at kasalukuyang nahaharap sa kasong paglabag sa Article 155 of the Revised Penal Code, na nagbabawal sa anumang gawaing lumilikha ng alarma at pubic scandal.
Dagdag pa, lumabag din sila sa ordinansa ng siyudad kaugnay sa pagpapatupad ng social distancing at mandatory na paggamit ng quarantine pass.