Kim walang balak layasan ang ABS-CBN: Kapamilya pa rin po ako

WALANG balak ang Kapamilya actress na si Kim Chiu na layasan ang ABS-CBN.

Siniguro ng dalaga na mananatili siya sa Kapamilya Network kahit matapos pa ang teleserye niyang “Love Thy Woman”.

Ito’y kahit pa pinayagan na ng Star Magic ang kanilang mga talents na pwede na silang tumanggap ng anumang projects mula sa GMA 7 at TV5.

Sa nakaraang virtual presscon ng ABS-CBN para sa nalalapit na pagtatapos ng “Love Thy Woman”, kinumpirma ni Kim na magkakaroon siya uli ng bagong proyekto.

“Sa ngayon, nasa Kapamilya network pa naman ako with ‘Love Thy Woman’ and may binigay sa aking isang project.

“Of course, I’m very happy to do it sa Kapamilya network pa rin, so, still Kapamilya!” paniniguro ng dalaga.

Naiintindihan naman daw ni Kim ang naging desisyon ni Johnny Manahan o Mr. M ng Star Magic na payagan na ang kanilang talents na magtrabaho sa ibang networks dahil nga tuluyan nang naipasara ang ABS-CBN sa free TV.

“Siyempre, iba naman iyong mga perspective namin, and si Mr. M, binibigyan lang din kami ng chance, iyong ibang wala namang work.

“But on my side, sobrang lucky ako that ABS-CBN still gives me projects para manatili sa Kapamilya network,” paliwanag ni Kim.

Ayaw pang magdetalye ng girlfriend ni Xian Lim tungkol sa next project niya sa Kapamilya Network, “Basta in the next few weeks, mapapanood nila ako every day and hanggang doon na lang muna. We’re still together forever.”

At para naman sa mga fans nila ni Xian, pagkatapos ng “Love Thy Woman” may isa pa silang gagawing project together.

“May niluluto sila for us and it’s gonna be exciting and kami rin, sobrang excited kami ni Xian and malapit na rin kaming magsimula.

“So it’s a surprise for all our solid supporters, and I’m sure they will be super excited and super happy katulad ni Xi,” chika pa ni Kimmy.

Samantala, abangan ang nalalapit na pagtatapos ng “Love Thy Woman” this week dahil tulad nga ng naipangako ng direktor nitong si Andoy Ranay, isang pasabog na ending ang naghihintay sa lahat ng viewers.

Kasama pa rin dito nina Xian at Kim sina Sunshine Cruz, Ruffa Gutierrez, Yam Concepcion at Eula Valdez na may kanya-kanya ring highlight sa huling linggo ng “Love Thy Woman” sa Kapamilya Online Live ng ABS-CBN Entertainment’s Facebook page at YouTube channel, at sa cable and satellite TV via Kapamilya Channel (SkyCable channel 8 SD and 167 HD, Cablelink channel 8, GSat Direct TV channel 22, and PCTA-member cable operators).