MAGIGING tatay na si Ed Sheeran.
Ibinalita ng The Sun na nag-uumapaw sa galak ang sikat na singer-songwriter at ang kanyang asawang si Cherry Seaborn sa nalalapit na pagdating ng kanilang unang supling.
Ilang linggo na lamang at manganganak na si Seaborn, 28, na ang pagbubuntis ay di ipinaalam sa publiko ng malihim na mag-asawa.
Sinabi pa ng British tabloid na hindi halos nakikita ang dalawa at madalas ay namamalagi lang sa kanilang bahay sa Suffolk, isang county sa England, habang naka-lockdown.
“Sobrang excited sila, pero nanatili pa rin silang matahimik tungkol dito,” wika ng source ng The Sun.
“Naging perfect excuse nila ang lockdown para di sila mapagkwentuhan, pero palapit na ang panganganak at nagbi-build ang excitement kaya nagsimula na rin silang magkwento sa mga kaibigan at kamag-anak,” ayon pa sa source.
Si Ed Sheeran, 29, at si Seaborn ay magkaibigan noong high school at nagsimula lamang silang mag-date nitong 2015.
Ikinasal sila sa isang pribadong seremonya noong 2018.