IPINAGTANGGOL ng Palasyo ang paglalagay muli ng Cebu City sa enhanced community quarantine (ECQ) matapos namang makapagtala ng pinakamaraming kaso ng coronavirus disease (COVID-19) sa lungsod kung saan umabot na ito ng 2,810 noong Hunyo 14.
Sa isang briefing, sinabi ni Presidential Spokesperson Harry Roque na nalampasan na ng Cebu City ang Quezon City sa pinakamataas na kaso ng COVID-19 na merong mahigit 2,600 kaso.
“Unang-una po, mayroon pong 2,810 na mga kaso as of June 14; 2,417 noong June 10; 1,749 noong May 31. Mayroon pong doubling time sa Cebu City na 6.63 case, ibig sabihin, anim at kalahating araw dumudoble po ang kaso ng COVID-19 sa Cebu,” sabi ni Roque.
Idinagdag ni Roque na 61 sa 80 barangay o 76 porsiyento ng mga barangay sa Cebu City ang apektado ng COVID-19.
“Meron pong 13 worst-hit barangays. Ang kaniyang testing positivity rate po ay 33to 36 percent. Ibig sabihin po, halos apat sa sampung tini-testing sa Cebu ay positibo. At ang transmission rate po niya ay 1.3, samantalang sa national po, 1.07 lamang ang transmission rate,” paliwanag pa ni Roque.
Samantala, inilagay naman ang Talisay City sa ilalim ng Modified Enhanced Community Quarantine (MECQ) dahil din sa patuloy na pagtaas ng mga bagong kaso.