2 dakip sa P2.43M shabu sa Quezon

ARESTADO ang dalawang lalaki nang makuhaan ng aabot sa P2.43 milyon halaga ng hinihinalang shabu sa magkahiwalay na buy-bust operation sa Candelaria, Quezon, Miyerkules.

Unang nadakip si Arnold Ona, 42, sa operasyong isinagawa sa Purok 4, Brgy. Mangilag Sur, dakong alas-7:45 ng umaga, ayon sa ulat ng Quezon provincial police.

Nakuhaan siya ng kabuuang 103.23 gramo o P2.105 milyon halaga ng umano’y shabu, at nabawi sa kanya ang P2,000 buy-bust money, ayon sa pulisya.

Dakong ala-1 ng hapon, naaresto naman si Charles Alexander Andal sa operasyong isinagawa sa Villa Del Carmen Subd., Brgy. Malabanban Norte.

Nakuhaan siya ng kabuuang 15.98 gramo o P325,992 halaga ng umano’y shabu, at P1,000 marked money.