HINDI natatapos sa taping ng Kapuso series na Descendants of the Sun (The Philippine Adaptation) ang pagiging close ng lead stars nitong sina Dingdong Dantes at Rocco Nacino.
Best buddies at BFF (best friends forever) ang peg ng dalawang Kapuso leading man hindi lang on-cam kundi pati na rin sa tunay na buhay dahil kahit sa likod na camera ay talagang super friends sila.
Klik na klik sa manonood ang tandem nina Dingdong at Rocco bilang mga sundalo sa DOTS kung saan ginagampanan nila ang mga karakter ni Cpt. Lucas at TSg. Diego, respectively.
Puring-puri sila ng mga manonood dahil sa makatotohanan nilang akting sa serye, mapadrama, mapaaksyon hanggang sa pagpapakilig ay kering-keri ng mag-partner.
In real life, totoong mga sundalo rin sina Dong at Rocco na katuwang ngayon ng military sa kanilang mga proyekto, lalo na sa pagbibigay ng tulong sa mga nangangailangan nating mga kababayan sa iba’t ibang lugar sa Pililinas.
Parehong miyembro ng military reserve forces ang dalawang Kapuso stars, si Dingdong ay Lieutenant Commander ng Philippine Navy, habang Petty Officer Third Class naman si Rocco.
Kung matatandaan, personal na binisita at kinumusta nina Dingdong at Rocco ang mga sugatang sundalo sa Army General Hospital sa Taguig, kung saan nakilala nila ang mga sumabak sa Marawi seige at iba pang conflict-stricken areas na lumaban sa mga terorista.
Hinding-hindi rin malilimutan ng DOTS lead stars ang paghahatid nila ng tulong bilang uniformed personnel sa mga biktima ng pagputok ng Taal volcano kasama ang mga miyembro ng Philippine Marines, Philippine Navy at Department of Social Welfare and Development.
Bukod dito, nagsagawa rin ng humanitarian mission ang YES Pinoy Foundation ni Dingdong katuwang ang Philippine Navy at Philippine Marines kung saan namigay sila ng relief goods sa mga taga-Tanauan, Batangas.
At alam n’yo ba na nagswak din ang dalawang aktor dahil pareho silang mahilig sa big bike. Sa report ng GMA 7, personal na inimbita ng Kapuso Primetime King si Rocco para mag-join sa grupo nilang Euro Monkeys sa isang leisure ride sa Tanay, Rizal. Ang Euro Monkeys ay isang exclusive motorcycle conglomerate na layuning turuan ng tama at safe driving ang motorcycle riders.
Bentang-benta rin sa netizens ang pagiging comedian nina Dong at Rocco. Sa katunayan, kamakailan lang ay nag-viral ang dalawa sa social media dahil sa kanilang TikTok video na usung-uso na ngayon.
* * *
Samantala, marami namang pinaiyak ang Kapuso Ultimate Star na si Jennylyn Mercado sa nakaraang episode ng Descendants of The Sun.
Grabe naman kasi ang drama moments ni Jen bilang si Doc Maxine sa nasabing mga eksena kung saan iyak siya nang iyak dahil super na-guilty siya sa nangyari sa ilang tauhan ng Alpha Team. Sising-sisi siya sa naging desisyon na iligtas ang isang buntis na rebelde na muntik nang ikamatay ng mga tauhan ni Capt. Lucas. Pinatawad na siya ng mga sugatang sundalo pero nagtitigas-tigasan pa rin si Big Boss (Dingdong) na tanggapin ang sorry niya.
Patuloy na tutukan ang Descendants of The Sun sa GMA Telebabad after 24 Oras.