AABOT sa P850,000 halaga ng hnihinalanh shabu at ecstasy ang nasabat samagkaahiwalay na operasyon ng pulisya sa Cavite, Lunes ng gabi at Martes ng umaga.
Nasamsam ang P680,000 halaga ng umano’y shabu sa buy-bust operation sa Governor’s Drive, Brgy. Gavino Maderan, bayan ng Gen. Mariano Alvarez, dakong alas-2 ng umaga, ayon sa ulat ng Cavite provincial police.
Nang dadakpin na’y nagpaputok ng baril at nagtangkang tumakas ang suspek na si Michael Dreu Taway sakay ng kotse, kaya gumanti at humabol ang mga pulis.
Naaresto si Taway nang magpasyang bumaba ng kotse at manakbo, habang ang kanyang di pa kilalang kasabwat ay nakatakas.
Nakuha sa kotse ni Taway ang isang kalibre-.45 pistola, magazine, walong basyo, isang digital na timbangan, at mga sachet.
Samantala, nasamsam ang 100 tableta o P170,000 halaga ng hinihinalang ecstasy sa isang motel sa Bacoor City, dakong alas-7 ng gabi.
Natagpuan ang mga tableta sa isang kahon ng sabon sa isa sa mga silid sa ikatlong palapag ng Golden Oasys Hotel.
Inaalam pa ng pulisya kung sinong nag-iwan ng mga tableta sa silid.