Marami nang nagtangkang kumuha ng komento ni Gretchen Barretto tungkol sa maligalig na buhay-may-asawa ng kanyang kapatid na si Claudine, pero walang nagtatagumpay, puro ngiti lang ang isinasagot sa kanila ng aktres.
Sa mga nagaganap ngayon kina Raymart Santiago at Claudine ay maraming kuwento ang nagkaroon ng linaw. Nu’n ay marami pang nagdududa sa mga istoryang naglalabasan tungkol sa pagpapagamot ni Claudine kahit pa mismong kapatid na niya ang naglabas ng rebelasyon.
Ang sabi ng mga tagasuporta ng aktres ay sinisiraan lang daw siya ng kanyang kapatid, gawa-gawa lang daw ang mga kuwentong matagal na nanatili sa basement ng isang ospital si Claudine, pero ngayon ay parang sumasang-ayon ang panahon sa mga ganu’ng akusasyon sa kanya noon.
Ngayong naghain na siya ng Temporary Protection Order laban kay Raymart ay naglabasan ang maraming kuwento, mismong si Raymart pa ang nagdiin na malaki ang kapasidad niyang mag-imbento ng kung ano-anong senaryo, sa madaling salita ay sinungaling si Claudine.
Kalaban na niya si Raymart ay kalaban pa ni Claudine ang mismong pamilya niya, paano kaya niya mapaniniwala ngayon ang publiko tungkol sa kanyang mga deklarasyon, may maniniwala pa kaya sa mga sinasabi niya laban kay Raymart ngayon?
Kung inayos na lang niya sa matahimik na paraan ang kanilang problema ay wala na sanang maglalabasang kuwento tungkol sa kanya, hindi na sana lulutang ang maraming istorya ng kanyang pagiging sumpungin, sana’y hindi siya pinagdududahan ngayon.
Nakapanghihinayang ang relasyong Raymart-Claudine, marami pa naman ang umasa na sa kanilang magkakapatid ay siya ang magiging matatag sa pagpapamilya, pero tulad nina Gretchen at Marjorie ay nabalewala rin ang pag-asa ng ating mga kababayan sa kanya.
Maligalig ang sitwasyong kinapapalooban ni Claudine Barretto, masyadong magulo, nakagugulantang ang mga rebelasyong inilalabas ngayon ni Raymart Santiago tungkol sa kanilang pagsasama bilang mag-asawa.
( Photo credit to Google )