ISANG mananaya sa Isabela ang nanalo ng P65.7 milyong jackpot prize ng SuperLotto 6/49 sa bola noong Linggo.
Ayon sa Philippine Charity Sweepstakes Office ang nanalo ay tumaya sa Ilagan City. Siya ang nag-iisang nakakuha sa winning number combination na 22-23-05-15-31-03.
Nanalo naman ng tig-P28,240 ang 29 mananaya na nakakuha ng limang numero.
Tig-P440 naman ang 1,469 mananaya na nakaapat na numero at balik ang P24 taya ng 22,137 mananaya na nakatatlong numero.
Ang mga nanalo ay mayroong isang taon upang kunin ang kanilang premyo. Ang mga premyo na mahigit P10,000 ay pinapatawan ng 20 porsyentong buwis.
Samantala, wala namang nanalo sa P183.4 milyong jackpot prize ng Ultra Lotto 6/58.
Hindi nakuha ang kumbinasyong 14-07-43-54-42-31. Posibleng umabot na sa P190 milyon ang jackpot prize nito sa Martes.
Isa naman ang nakakuha ng limang numero at mag-uuwi ng P280,000. Tig-P2,650 naman ang 419 mananaya na nakaapat na numero at balik ang P24 taya ng 11,260 mananaya na nakatatlong numero.