INIIMBESTIGAHAN ngayon ng pulisya ang napaulat na pagpatay ng mga naka-bangkang armado sa dalawang mangingisda sa bahagi ng dagat na sakop ng Ternate, Cavite, Huwebes ng hapon.
Pinagbabaril hanggang sa mapatay sina Ramil Culanag at Andres Oliveros habang pabalik ng Navotas City, dakong alas-3, ayon sa ulat ng Calabarzon regional police.
Pawang mga sakay umano ng tatlong kulay-asul na bangka ang mga armado, batay sa ulat na natanggap ng regional police.
Nagsagawa ang Cavite Maritime Police ng operasyon sa Ternate at Naic para hanapin sina Culanag at Oliveros matapos matunugan ang insidente Huwebes ng gabi, pero tumigil nang malamang narekober na ng mga kapwa mangingisda ang dalawa.
Inaalam pa ng Maritime Police ang pagkakakilanlan, kinaroroonan, at motibo ng mga salarin.