Salpukan ng motor: 2 patay, 1 sugatan

DALAWANG lalaki ang nasawi at isa pa ang nasugatan nang magsalpukan ang dalawang motorsiklo sa Roxas, Isabela, Martes ng hapon.

Kapwa dead on arrival sa ospital ang driver ng dalawang motor, na sina Edwin Parocha at Rex Bulauan, ayon sa ulat ng Isabela provincial police.

Nagtamo naman ng mga pinsala sa katawan ang angkas ni Parocha na si Amador Ticman.

Naganap ang insidente sa bahagi ng National Highway na sakop ng Brgy. San Placido, dakong alas-2:30.

Lumabas sa imbestigasyon na lumipat sa kabilang lane ang motor ni Parocha kaya nasalpok ang motor ni Bulauan.