ISANG lalaki ang nasawi at ilan pa ang nasugatan, kung saan pito ang malubha ang kalagayan, nang bumaligtad ang sinakyan nilang jeepney sa Bongabong, Oriental Mindoro kaninang umaga.
Dinala sa pagamutan ang humigit-kumulang 30 sakay ng jeepney, ngunit di umabot nang buhay si Rodolfo Gunay, sabi ni Lt. Col. Socrates Faltado, tagapagsalita ng Mimaropa regional police.
Pito sa kanila, na nakilala bilang sina “Bente” Carreon, Merlinda Carreon, Berto Mendoza, Liza Feleciano, Rain Aregaldo, Floren Manalo, at Victoriana Gunay, ay nasa kritikal na kondisyon.
Pawang mga bahagyang pinsala lang umano ang tinamo ng ibang sakay.
Naganap ang insidente sa Brgy. Hagan alas-9:30.
Bumibiyahe noon ang pribadong jeepney mula Brgy. Rosacara, Bansud, patungong Brgy. Lisap, Bongabong.
Lumabas sa inisyal na imbestigasyon na nagloko ang makina ng jeep at nawalan pa ng preno.
Ililipat ang mga malubhang nasugatan sa isa pang pagamutan sa Calapan City para sa karagdagang lunas, habang patuloy na iniimbestigahan ng lokal na pulisya ang insidente, ani Faltado.