NA-HOOK na rin pala ang Asia’s Multimedia Star na si Alden Richards sa sikat na Korean girl group na BLACKPINK partikular na sa isang member nito.
Inamin ni Alden na na-in love na rin siya sa ganda ng Korea nang malibot niya ang ilang lugar doon pagkatapos tanggapin ang Asian Star Prize sa Seoul International Drama Awards last August.
Kuwento ng Pambansang Bae, nagpaplano na siyang bumalik sa Korea kasama ang pamilya para doon mag-celebrate ng Pasko.
“Sabi ko na parang, ‘Wow ang sarap naman dito sa Korea.’ Kaya nu’ng pagkauwi namin, kinausap ko ‘yung family ko na we’ll be spending Christmas there this year,” pahayag ni Alden nang makapanayam ng press sa #LoveKorea Culture and Tourism Festival nitong nagdaang weekend.
At bukod nga rito, nagustuhan din niya ang K-Pop girl group na BLACKPINK lalo na ang main dancer nitong si Lisa Manoban.
“Wow ang galing! Wow ang cute! Ang ganda niya! Hanggang yun na, hanggang sa… ‘Ayun na, na-hook na ako kay Lisa,” pag-amin pa ng lead star ng laging trending at pinag-uusapang Kapuso primetime series na The Gift.