AlDub Nation umaasa pa ring pagtatambalin ng Eat Bulaga sina Maine at Alden

LALARGA na ang pelikula nina Alden Richards at Maine Mendoza na “Imagine Me & You” sa Netflix ngayong Sept. 17, ayon sa tweet ng director nitong si Mike Tuviera.

Kinunan ang halos kabuuan ng movie sa Como, Italy kaya kung gustong balik-balikan ng AlDub fans ang kilig moments ng kanilang Phenomenal Loveteam eh, mag-subscribe agad sa Netflix.

Of course, sa ngayon, kanya-kanya muna sa kani-kanilang showbiz career sina Alden at Meng. Pero umaasa pa rin ang AlDub Nation na sa tamang panahon ay magsasama muli sa big screen ang kanilang mga idolo.

Hindi pa rin sila nawawalan ng pag-asa kahit na nga may kanya-kanya nang career ngayon ang AlDub loveteam. Naiintindihan naman daw nila na kailangang mag-grow nina Alden at Maine kaya abangers lang sila.

At malay n’yo, maisipan muli ng Eat Bulaga na bigyan ng magandang segment sina Maine at Alden para sa ikaliligaya ng ADN. Matagal-tagal na rin namang wala ang Kalyeserye kaya baka naman…