KALABOSO ang 34-anyos na lalaki matapos nitong pugutan ng ulo ang kanyang live-in partner at i-hostage ang kanyang tatlong taong gulang na anak na babae sa Quezon City kahapon.
Sumuko si Alejandro Llena, ng Arba st., corner Munoz st., Brgy Batasan Hills, matapos ang ilang oras na negosasyon.
Nakatanggap ng tawag ang pulisya ala-1:15 ng hapon kaugnay ng isang lalaki na armado umano ng baril at naglalakad sa Arba st., Brgy. Batasan Hills.
Pagdating ng mga pulis ay bitbit ng suspek ang bata na tinutukan nito ng baril sa ulo.
Nakumbinsi ng mga pulis na sumuko ang suspek.
Nang kausapin ng mga pulis ang bata ay nalaman nila na pinatay ng suspek ang kanyang ina. Pagpasok ng mga pulis sa kanilang bahay ay tumambad sa kanila ang ulo ni Maricel Balaoro Alejo na nakahiwalay sa kanyang katawan.
Ayon sa suspek mayroong bumubulong sa kanya kaugnay ng panlalaki ni Alejo.
Nabatid na ang suspek ay nasa drug watchlist ng pulisya. Sumuko umano ito noong 2016 pero nagpatuloy sa paggamit ng ipinagbabawal na gamot.
Narekober ng pulisya sa crime scene ang kalibre .45 pistola, patalim, butcher knife, at mga bala.