NAPUNO ng tensiyon ang ginanap na PBB Otso “Batch-babakan” sa pagitan ng batch 1 at 4 Big Four last Saturday night dahil sa mind game na ipinagawa sa kanila ni Kuya.
Naglaban ang dalawang grupo sa task ni Big Brother kung saan nag-unahan ang mga housemates na kolektahin ang mga pouch na may lamang numero.
Kapag nakumpleto na nila ang lahat ng pouch, kailangang i-add nila itong lahat gamit lang ang kanilang isip at ang makakakuha ng tamang sagot ang siyang magwawagi. Unang sumagot ang Batch 1 (Lie, Karina, Jelay at Kaori) at agad nilang nakuha ang tamang sagot.
Ngunit nabuking ni Kuya na may mga ginawang guhit ang grupo ni Lie sa mesang pinagpatungan ng mga numero kaya pinatawag uli sila ni Big Brother at sinabi ang nagawa nilang violation.
Pinaulit ni Kuya ang challenge sa dalawang grupo kaya nagkaroon ng chance ang batch 4 (Kiara, Akie, Argel at Wealand) na masagot ang pinapa-add na numbers sa kanila pero dalawang beses silang nagkamali. Kaya sa ending ng hamon, ang batch 1 pa rin ang nagwagi na nakuha agad ang correct answer.
Dahil dito, sa batch 1 nga kinuha ang ikaanim na housemate na mapapasama sa PBB Otso Big Night. At matapos nga ang ilang minutong text voting, ang Filipina-Japanese na si Kaori Oinuma ang nagwagi at magkakaroon ng chance na maging Ultima8 Big Winner. Tinalo niya sina Karina Bautista at Jelay Pilone.
Ipinakita ni Kaori sa madlang pipol ang kanyang katatagan at disiplina sa loob ng Bahay ni Kuya. Napalapit at hinangaan agad ang dalagita sa mga manonood dahil sa kanyang pagpupursigi na makatulong sa pamilya sa pamamagitan ng pagiging caregiver sa edad na 16.
Matapos magpasalamat sa lahat ng mga bumoto sa kanya at sa mga taong patuloy na sumusuporta sa kanya sa PBB Otso, nangako rin si Kaori na lalaban siya hanggang sa dulo.
Si Kaori nga ang sixth housemate na siguradong pasok na sa “Big Night,” kasama sina Fumiya Sankai, Yamyam Gucong, Lie Reposposa, Ashley del Mundo at Kiara Takahashi.
Sa mga susunod na challenge na ibibigay ni Big Brother malalaman kung sino pa ang dalawang housemate ang kukumpleto sa Big 8. In-announce na rin ni Kuya na may isang maswerteng housemate ang mananalo na condo unit. Ngayong gabi malalaman kung anu-ano pa ang mga bagong pasabog at panggulat ni Kuya sa madlang pipol.
Kaya huwag na huwag nang bibitiw sa huling dalawang linggo ng PBB Otso after Sino Ang May Sala? sa Primetime Bida at sa Kapamilya Gold pagkatapos ng Los Bastardos.
Disclaimer: The comments uploaded on this site do not necessarily represent or reflect the views of management and owner of Bandera. We reserve the right to exclude comments that we deem to be inconsistent with our editorial standards.