Sikat na aktor parang ‘baby’ pag inatake ng topak, bantay-sarado ni daddy

BANTAY-SARADO pala ang aktor ng kanyang ama kapag nasa trabaho dahil kapag napapagod daw ito ay sinusumpong ng topak.

Kuwento sa amin ng isang source, “Okay naman siya mahusay makisama, sobrang kulit, maloko. Jolly kasi siyang tao kaya halata na kapag may topak na siya, tahimik at nakasimangot na.”

Ang aktor ay mahusay sumayaw at sa katunayan kapag break time sa set ay gumigiling-giling ito kasama ang ilang aktor din na dancer.

“Biruan sila kasi nang biruan kaya masaya naman sa set,” sabi pa sa amin.

At kaya siya binabantayan ng tatay niya ay para makontrol ang topak nito dahil minsang hindi nabantayan ng ama at personal assistant lang ang kasama ay para itong batang nagmamaktol dahil nagugutom na raw siya.

“Actually, ‘yung topak niya is more of parang bata o basta na lang hindi kikibo at sisimangot. Pero kapag take na, okay naman, pero halatang wala sa mood,” kuwento ng taga-production sa amin.

Kaya pala nang minsan namin siyang mainterbyu ay wala sa mood tapos nu’ng inabutan na siya ng pagkain ay bigla na siyang sumaya.