RIA ATAYDE AT JM DE GUZMAN
Habang sinusulat namin ang kolum na ito ay kasalukuyang nasa Hong Kong si JM de Guzman para sa isang show at planong manood ng concert na hindi binanggit sa amin kung sino.
Pero babalik naman siya sa Lunes o Martes para sa premiere night ng pelikula nila ni Arci Muñoz na “Last Fool Show” mula sa Star Cinema at N2 Productions.
May nagkuwento sa amin na “Ma” pinaikling mama ang tawag ni JM kay Sylvia Sanchez dahil siguro mag-ina ang role nila sa teleseryeng Project Kapalaran mula sa RSB unit.
Base pa sa sa nakikitang samahan nina JM at Sylvia sa set ng serye ay masaya at laging nagbibiruan ang dalawa lalo’t hihirit pa si Arci (leading lady ng aktor sa serye) ng kung anu-ano.
“Parang ibinuking yata ni Arci si JM kay tita Sylvia na nanliligaw siya kay Ria (Atayde) kaya alam na ng mom ni Ria na nanliligaw siya. Parang sabi ni tita Sylvia, ‘Wala akong problema sa yo (JM).’ Hindi ko na narinig ‘yung ibang sinabi,” kuwento ng aming source.
Parang boto naman si Ibyang kay JM para kay Ria. At mukhang okay naman din sa dalaga ang panliligaw ng aktor dahil napapangiti siya kapag natatanong namin tungkol dito.
Anyway, abangan ang “Last Fool Show” sa Abril 10, sa mga sinehan nationwide.