SAM MILBY
PAGOD na pagod pala si Sam Milby sa karakter niya bilang si Ace Corpuz sa teleseryeng Halik. Effort talaga ang aktor para maging believable ang kanyang acting.
Ito ang kuwento sa amin ng handler ni Sam na si Caress Caballero ng Cornerstone. Napag-usapan nilang araw-araw na ang taping nila ng Halik at gustung-gusto raw ng netizens na mamatay siya sa ending dahil sobrang sama ng karakter niya. Magsama raw sila ni Yam Concepcion bilang si Jade.
“Sabi ko nga kay Sam, ‘Sorry Sam love kita pero ang sama mo sa Halik kaya gusto ko pahirapan ka muna bago ka mamatay.’ Hayun tawa nang tawa,” kuwento sa amin ni Caress.
Nababasa naman lahat ni Sam ang mga komento ng netizens sa kanya at ang pinakamatindi ay nakakatanggap na siya ng death threat. Hindi raw niya alam kung paano nalaman ng bashers ang personal number niya.
Tinanong namin kung anong reaksyon ng aktor, “Wala, kibit balikat lang siya. Hindi niya pinansin pero di ba birthmate parang nakakatakot naman na may banta sa buhay niya dahil sa role niya sa Halik?” sabi ng nag-aalalang handler.
E, kasi nga nadadala na rin siguro ang mga nanonood sa sobrang kasamaan ni Ace kaya dapat ay may bawi sa karakter niya sa ending ng serye ngayong Abril.
Maging si Yam pala ay nakakatanggap ng hindi magagandang salita mula sa netizens at pati mga TFC subscribers ay apektado rin kina Ace at Jade.
Samantala, magkakaroon ng concert si Sam kasama sina Jericho Rosales at Yen Santos sa ibang bansa na may titulong “Acoustic Hearthtrobs: 2019 Concert Tour” produced ng Musique Mix.
Gaganapin ito sa tatlong lugar sa Canada: Toronto Pavilion sa May 3; South Pointe Community Center Edmonton, May 4; at Burton Cummings Theater Winnipeg, May 5.
Anyway, pagkatapos ng Halik ay diretso bakasyon si Sam sa Amerika kung saan doon na rin siya magdiriwang ng kanyang kaarawan sa Mayo 23. Babalik ng Pilipinas ang aktor sa Hulyo 11.
“Kailangan daw niyang mag-recharge nang bonggang-bongga birthmate kasi nasagad siya sa Halik,” say ni Caress.
Sabi namin, sana ang next project ni Sam ay bida kontrabida ulit ang role niya dahil mas bagay sa kanya kumpara sa pa-good boy.
“Sana nga birthmate. Saka si Sam mature na, marunong ng magtipid,” natawang sabi ng handler ng binata.
Dati-rati raw kasi ay mahilig sa gadgets ang binata na kung anong latest model ng cellphone ay mayroon siya, ngayon daw ay hindi na at nakikinig na kapag pinagsasabihang magtipid.
As of now ay wala pa ring girlfriend si Sam at hindi na siya naghahanap, wait na lang daw ang binata sa tamang panahon.
Anyway pagbalik ni Sam sa Hulyo ay aasikasuhin na niya ang bagong single niya sa album niyang “Sam: 12” mula sa Star Music.
“Hindi masyadong na-promote ni Sam ang album niya kasi naging busy na siya sa Halik. Siyempre mas inuna niya ang serye. ‘Yun lang kailangang mag-double time siya sa promo ng next single niya,” saad pa ni Caress.