KATHRYN BERNARDO AT DANIEL PADILLA
MARIING pinabulaanan ni Kathryn Bernardo na engaged na sila ni Daniel Padilla.
Kamakailan kasi ay kumalat ang balita na nag-propose na raw si Daniel kay Kathryn nang magbakasyon sila sa Japan kasama nitong nakaraang holiday season kasama ang kani-kanilang pamilya.
Nag-ugat ito sa nakakabiting Instagram post ng nanay ni Kathryn na si Mommy Min na nagsasabing, “May nag-propose.”
Sa panayam kay Kathryn sa isang event, sinabi nitong walang proposal na naganap sa Japan, “Iyung pinakita, ‘yung (post) sabi ko, ‘nakakaloka kayo, mababaliw ‘yung mga tao.’ Hindi, hindi po talaga.”
Diretso namang sinabi ng tinaguriang Queen of Hearts na open naman siya sa usaping “marriage proposal” pero aniya medyo matatagalan pa ito dahil kailangan muna nilang paghandaan ni Daniel ang kanilang future.
“Hindi muna siguro. Open ako sa idea pero kailangan pa naming magtrabaho pareho and baka too young pa ngayon (ang magpakasal),” lahad ni Kathryn.