HINILING ni House Speaker Gloria Macapagal Arroyo sa bicameral conference committee na maglaan ng P350 milyon para mabili na at maipamahagi sa may 8,000 pamilya ang lupa sa squatter’s area sa Quezon City.
Sa pagdinig ng Oversight Committee on the National Government Center sinabi ni Arroyo na sumulat ito sa bicam committee upang hilingin ang pondo na ibibigay sa Department of Public Works and Highways para mabili na ang lupa na inuukupa ng mga informal settler sa Brgy. Holy Spirit at makapagpatupad na ng reblocking.
Si Arroyo ang pangulo ng maisabatas ang National Government Center Housing and Land Utilization Act of 2003 (RA 9207) na naglalayong bilhin at hati-hatiin ang lupa na kinatitirikan ng bahay ng mga informal settlers.
Umabot sa 20,000 ang pamilya na natukoy na dapat magbenepisyo sa NGC subalit 11,000 pa lamang ang nabigyan ng titulo. Kulang ang budget na inilalaan ng gobyerno kaya hindi ito natapos.
Inatasan din ni Arroyo ang National Housing Authority upang tapusin na ang listahan ng mga may-ari ng lupa na kailangang bilhin.